تركوني أهلي ..طلال حيدر

تركوني أهلي
-----------------------------------
تركوني أهلي بهالليل
تركوني وراحو
لا أنا ارتحت بسفر الليل
ولا هن ارتاحو
قلتلن خلوني نهار
أخدوا الارض وراحو ..
تركوني وحدي بهالليل
تركوني وراحو
وسالتون عن اسم اليوم
سكتوا ماباحو
قلتلن عيروني يوم
تركووني وراحو ..
ولمن وعي طيرالنوم
حملني ع جناحه
أنا رح امرق متل خيال
مطرح ماراحو
ع الناس الكانو بهالصيف
ع الصيف وافراحه
واول مابيرحل هالليل
اتعلق برياحه
-------------------------------
هـ الكان عندن بيت
هـ الكان عندن بيت
وصورة
عليها ناس
معلّقين بخيط
وقعوا عن سطوح العمر
وسْتلَقِتّن الحجار
وِقْعوا
متل ما بيوقع المشمش
على ولاد الزغار
وين أهلي؟
وين طاحونة حزن خيي الزغير؟
وين طيارة ورق نومي
على هزّة سرير؟
وين الإيدين؟
الحطّت اْبريق الشتي فوق الحصير
وين شبابيك
الفات منها الصوت
متل الزمهرير
وين رمان السقف
مقطوف ومعلّق
متل عُمْر الكبير
لك.. عنّ يا قلبي
متل هـ النحل
جُوّات القفير
وقع العمر
ما بين إيد
وبين هزّات السرير
---------------------------------
صوتك مرق عالمسافة

صوتك مرق عالمسافة وسلّم عليها
ما صدّقت إنو مرق تا شافت الحِنّة عا إيديها

قال الصوت خليكي ما دام جايي هوى
رح ضلّ ناديكي .. يا ريت نبقى سوى

تركض غزالة حافية بضوّ القمر حتى تمسّيكي
بس تحلم منامات كشّفها الهوى .. نومِك يغطيكي
وصل الخبر عا مصر .. وقفو ملوك النيل يتأهّلو فيكي

صوتك مرق يا طير قلّو يسلّم عليي
ما صدّقت إنّو مرق تا نشفت الدمعة بعينيّي

كنت تقلي غنّيلي .. غنّيت ما في حدا
وينك طِلّ مقابيلي .. صوتك صاير صدى
----------------------------------------
حبّ
---------------------------------------


ياحبّ
خدني معك يا حب، شي مشوار
وع السكت وشوشني، سرار سرار
محّي لي أيامي بايديك الزغار
مدري شو صابو، هالعمر
فتّح وصار قمار

يا ريت هالعمر الهرب
يرجع ونحنا زغار
لا بعود اقرا بها الكتب
ولا بعود عمّر دار
بقشّقش حوالييّ حطب
وبشعّل بها النار