بتســـألي000000بقلم : ابن الضيعة

بعد خلاف وخصام تحلو المصالحة ... وسألتني
هل مظهري وثيابي أنيقة ....؟
فقلت :
بتسأليني حلوة عليِّ تشكيلة الألوان
أنت يا روحي اللون أنت السحر
أنت ورود تفنَّن برسمها نيسان
أنت بلسم لجروح كواها الصبر
صحيح أنا بالحب مو كتير فهمان
لكن ... بحبك قاموس وسع البحر
بحبك أنا ولحبك بضل عطشان
يا قمر الليل وقطر الندى ونسمة عطر
من غمزت عيونك بعدني سكران
يا كروم خضرا ما بتنضب ثمر
ضمتك لصدري ما رح كون نسيان
اليد لبتضمك بعد إِيدي يبعتلا الكسر
رغم قسوتك من ربي أنا طمعان
يلهمك تسامحي مظلوم وتمحي الكدر
شفت بحلم واقف عند رب ديان
كان نهار وليل يمكن بيوم الحشر
بكتاب عمري عند ربي مكتوب عنوان
حبك يا روحي هبة من رب البشر
وبلحظة يأس وشعور بالحرمان
طلبت من ربي يسامحك والرب غفر
رب الكون سيد التوبة بيمنح الغفران
ليش ما نسامح ونغفر نحنا البشر
رح ضل حبك لو أجمعت كل الأديان
انو حبك يا روحي حرام وجريمة وكفر
يا رب تعود حكاية أهل الكهف كمان
ونام أنا وأنت بمغارة بعيدة شي دهر
ويطول الليل والسهر ويوقف الزمان
واكتب أنا بحبك حكايا وانظم شعر
يا رب تشتي الدني ويصير طوفان
وكرمال حبك اغرق أنا بشي نهر
وتتفتت عضامي ع حجار الصوان
والسمك ياكل بلحمي ..... دهر
أماني تركتها أنا برقبة الخلاَّن
لمَّا بموت ... وقبل وضعي بالقبر
ما بدي تياب يلبسوني ولا أكفان
بنظرتك كفنيني ورميني بشي بحر

كلمات الها فعل الطوفان بتمحي أي أثر للخصام.
وحروف فيها قواميس من العطر بتلغي كلمة الحرمان
ومشاعر بكل الألوا ن هيي متل البلسم بتداوي و بتروي اي عطشان
وقصص من كل الأديان بتقول قديشك انسان
شكرا ابن الضيعة

وليد السابق كتب:

لك حفيت رجلي.... و أنا اسأل عن الضيعة.... و صلت على التلة.... قالوا لي ابن الضيعة مو هون.... راح يكتب قصيدة و بطل يقطف زيتون...... و ركض على المنتدى... لشوف القصيدة.... يا سلام....رايق دوماً... يسعد صباحك.... مثل ما أسعدت صباحنا..... محبة

انا شفتك ع راس التلة بس كنت واقف ع راس الزيتونة ندهتلك ما رديت ... فكرت بدك حدا غيري
........ يسعد صباحك

sonnenblumen كتب:

ابن الضيعة سكتلك وكنت عم قول يلا اليوم بيعبرنا بكرا بعد بكرا
قلنا مشغول مو فاضي اما تطعنا بالصميم وتحكي مع بس وليد والله انا بحبه
بس شو هوه عراسه ريشة نحن لاء وماحسد ولا ديقة عين التنتينننن
واذا الموضوع قصة تلة مستعد عيط ل صبا و Ghost ونخلي وليد تحت مابيصير يجي معنا
لانه غيرانه منه شفت ياابن الضيعة كيف فرقت و خليتني غار من وليييييد
(وليد ماتصدق بس منغاظة من ابن الضيعة )

يعني حبيت سويا من مبدأ هز الورد بتشم ريحتو وقلت اذا انغاظت sonnenblumen بتمتع بكلماتا الحلوين دائما
وبعدين انا خفت على وليد يضيع وقت رايح يدور عليي ليساعدني بقطاف الزيتون ... يسعلي أوقاتك وبعتذر من
Ghost كمان والكل غاليين كتير على قلبي

[quote]

هوي صحيح انا ما اشتغلت بالزيتون(مو لانه مو خرجي لا والله)بس كان يجعني قلبي عليكن منشان ما تملوا كنت اقعد براس الشجرة واحكيلكن حكايات وكنت حطلكم موسيقى على ذوقي (واحيانا كنت اضربكن على راسكن بحبات الزيتون)...
بس عن جد نزعتها هالمرة يا ابن الضيعة ..يعني لانه وليد فرز لنفسه سيارة صرت بدك تتحيزله (وليد مو ديقة عين ولا حسد ابدا ابدا يعني بس غيرة)
طيب هي غوست عنده سيارة ام عيونات وانا عندي سيارة هوائية وsonnenblumen عندها سيارة بخارية...اعترف بشو واعدك وليد..
انا هلق منغاظة فعلا وكنت رح اعمللكم عزيمة على( حسااااااااااااااااابي) ع راس الشجرة وجيب اركيلة وشاي وجوز ولوز وفستق ..
هلق رح تضطرني كمان اتحيز
ولعيونك sonnenblumen انتي بس اشّري

شو القصة يا جماعة بروح يوم ع الضيعة وبرجع بلاقي الدني خربانة
شو عاملكن انا والله انا درويش والقط بياكل عشايي هي اذا ما أكل الفطور كمان
يا جماعة وليد تعب واجا من كندا ليساعدني بقطاف الزيتونات وضيع الطريق اي بتركو ضايع بينهان عليكن ... لا والله ... ما حدا بيقبل هالحكي بس يلا بيعين الله
وكرمال هيك انا راجع ع الضيعة ورح اعتكف هونيك وازعل ومارح ارضى لتروحو كلكن تجيبوني وبعراضة كمان Ghost انت بتسوق السيارة تبعيتك sonnenblumen بتجهزيلنا شي وليمة على كيفك
وصبا علقت وعلقت حالك عليكي الجوزات والفسقات والاركيلة وبتغبيلنا شوية عتابا ........ أخي وحتى تنبسطو مابدي وليد يروح معكن مليح هيك صباحكن فل وورد ومنتور

BEAUTY SOUL كتب:

يا ابن الضيعة ...... دوما متألق بكتابتك و دوما بحسك انت مب تكتبلنا قصيدة فحسب بل أغاني ...شكرا الك و لرواقك .... (((((بس بدي قلك شي بدون زعل : مو حرام عليك كرمال حب تتعذب كل هل قد ؟؟؟ يعني كل شي معقول.... بس تتفتت عظامك على حجر الصوان مم نرضاها .... مو مشان شي بس لأنك انت اخونا الكبير و مافينا نستغني عنك و لا عن ضيعتك و لا عن الزيتونات و المكدوس .....))))بتمنى تقبل مزحي ... شكرا الك لأنك أمتعتنا بقصيدتك

خيتو هلق اذا حكينا شي كلمة بيغارو وبيهاجموني هدول جماعة الفريق التاني لذلك رح قلك ولا يهمك مارح ازعل ابدا والله لايجيب زعل ونورتي الصفحة