طير يا عصفور ... بقلم : ابن الضيعة

وينك يا عصفور انقطعت أخبارك
ونغمات متل النور تركت ديارك
بالله يا عصفور حكيلي أسرارك
ها لقلب مقهور...
ليش يا عصفور ..؟
قلِّي ... شو بيوجعك
جانحك مكسور...!!
والقمر مسحور بريشة جانحك
آآآه ... يا عصفور
الهوى شو بيجرحك
هَدّي شوي يا عصفور
لا تخلي البوم يحل مطرحك
وطير... طير يا عصفور
كل السما مسرحك
وأنت بها لأرض بتدور
سأل الورد ونجوم السما
سأل الراعي وهالنا طور
عن خِلّْ هَجَرْ داري ودارك
ولا تخاف يا عصفور... فخ هالنا طور
الناطور جارك
وبحياتك يا عصفور
خدني ... معك
ع مروج كلا زهور
آه ... لو تعرف
قلبي شو بيشبهك
من سنين وها لشط مهجور
رجاع يا عصفور لا تغادر التلة
رجاع لمطرحك
لغصون السنديان والزعرور
هونيك غزول عشك
هونيك مضجعك

يسلمو دياتك يالله هالحكيات شوحلوين ..ذكروني باغاني فيروز ووديع الصافي كلن رقة وحلاوة شكرا الك

ابن الضيعة قصيدتك هي بحد ذاتها عصفور شجن يطل على شرفات عذوبة الضيعة...عصفور يغرد هائما باغاني الروح النقية الصافية ...
عصفور يترجم لغة خرير السواقي ويجيد رسم دوائر الماء على مياه الجداول والأنهار......عصفور يهامس خصل الريح وخضرة الكون... شكرا ابن الضيعة على روعة وجمال حروفك

[b] يسعد مساك ياصديقي
قليلة هي الكلمات التي تجعلني اطرب لها واتمايل مع نسائمها ..لكن كلماتك المتجددة تعطيني هذاالشعوردوما
دمت لنا صاحب قلم يطرب ..وصاحب قلب أصيل طيب

يسعدلي صباحك يا رايق
كلماتك هي كلمات غنية عذبة بصوت عصفور مغرد ......... شكرا الك يا ابن الضيعة و للرواق يللي حسينا فيه

حذني معك.... يا عصفور.... لدروب صبغتها شمس نيسان...لسهول تراقص الريح فجراً.... لمنزل قديم... مازال يحمل وجه إنسان... لمواسم كنتُ فيها فارساً.... اسابق ريح الشرق... و أسبقها... و أسبقها.لا يقوَ علي قرص الشمس... ولا... ترتفع بوجهي جدران.... آه يا عصفور..يالطعم الخشب(هنا).. يالسيول الشوق.. سقطت كل عناوين...القمح.... و أستقالت .. ذاكرة الوردِ... و أستقالت.... خارطة الزمان... عزيزي ابن الضيعة... يالبوحك... يالروعته... يالروعتك.... كل الشكر... ابن الضيعة....

صرت خاف جيب سيرت بنت الضيعة ... قلت بحكي مع هالعصفور ..
بلكي بتحلو عن البنت حرام ... فضحتوا ..
سهى ** غوست ** زوننبلومن ** صبا ** نرجسة ** بيوتي ** وليد ** شكرا لكلمتكن الاحلى من العسل .. بس شي كم يوم راجع لبنت الضيعة ما فيني .. هالمرة رح قلا .. يابنت لا تغادري الضيعة .. ارجعي