المصطلحات في مسلسل ضيعة ضايعة

موضوع: المصطلحات في مسلسل ضيعة ضايعة 11.02.09 3:41

سلام يا اصدقاء
هلا هوي بيجوز انو ما تندرج هالفقرة هون بقسم تعلم اللغات لولا انها لغة بحد ذاتها يعني بما اني صرت فيها خبيرة قررت اني افتح دورات و انا جاااااااااااهزة تماما حياتيه اتو ..... ببلاش للمرة الاولى مشان السمعة الحسنة على ما يزيد الطلب ساعتها منفكر بقديه رح نعمل الساعة
استمتعوا امانة هه

أبّع ركيد = أسرع بالركض
آبول = موافق من كلمة قابل
اتلسّع = اتناول الطعام
أدّوم = مطرقة
استحكيه = تكلم معه
ألاشين = جوارب
انئلع = أغرب عن وجهي
انعفطوا = انكمشوا = ألقي القبض عليهم
آي آي = نعم نعم
اينجنور = مهندس
بحّتو = ضربه ضربا مبرحا
برغاليا = بلغاريا
برطيل = رشوة
بريديت باردو = بريجيت باردو
بزّاقة = من الحشرات الزاحفة
بعّئ = اصرخ
بنشر = جنّط
تاسومة = صرماية = حذاء (سريانية)
تخّر = أفسح الطريق
تخريجة = درخوشة = ثغرة
تضرب بنيعك = عليك اللعنة
جعاري = عالي الصوت
جفت = بندقية صيد
حرمباية = الحرباء من أنواع الزواحف وقد أخطأ المؤلف حين قال إنه نوع من الزواحف دون الإشارة إلى أنها الحرباء
حلّ عنّو = دعك منه
حليئ = إذهب من وجهي
جلجوء = لاقيمة له
درمل = إذهب بسرعة
دشّر = دع
دلدوء = منافق أو من لا قيمة له
دينتي = أذني
ترخّ عليه = تثقل عليه
سجرة = شجرة
سدّو لباجوقك = سدّلي نيعك = سدّ بوزك = أغلق فمك (عن الكلام) ويقال بأسلوب إهانة
سلاقي = من أنواع الكلاب والفصيح هو سلوقي
شبك؟ = ماذا بك؟
شحّاري = شحميطي = شحّاراسي = يا للمصيبة
عزرط = لا يقدّم ولا يؤخّر وهي من الكلمة العربية الفصيحة عضروط أي التافه
عيٌن = انظر (وهي الكلمة الأكثر شيوعاً في المنطقة)
غلونجي = أسعاره مرتفعة
فا = فهنه = يوجد
فدّان = ثور
فرخ افوكاتو = محامي مبتدئ
فوّامات سواجير = فلاتر السجائر
قضّوضة = سندويشة = شطيرة
كعرو = قلّعو = طرده شر طردة
كرفتّا = كرافة
كزدانة = باقية
لاطي = مترقب بحذر
لبود = انتظر بهدوء
ضحكتو لقراميش دينيه = ابتسامة عريضة
طأمش = البس الطّقم
ماعن طيبي = عن غير قصد مني
ماحود = شي ما
مجعوز = مزعوج = منزعج أو متضايق
مدير الريجي = مدير مؤسسة التبغ
مشبوح شبح = ملحوش لحش = ملقى بإهمال
مصرات = مصاري = نقود
ميتور = دراجة نارية
ناجس = بشكل نهائي
نسفئون = نطرقن = نتناولهم(للأطعمة و المأكولات)
هبّور = شرشوح
هفاه هفي = هفهنه هفي = أزاله تماماً
واح = واحد
ولا = أيّها (أداة لنداء غير المحترمين)
يا حيفات = وا أسفاه
يبريني عن ديني = قسم بمعنى:' أكون خارجا من ديني إذا حصل كذا وكذا' وهو فسم خطير ومذموم
يبلفوهم = يحتالون عليهم
يحمّك = دعاء بمعنى فلتصب بالحمى
يعركس = يعرقل
يكحشوهن = يطردوهن
ينبّز = يظهر
فروج بروسلي = فروج بروستد

حياتي اتتتتته

فرخ أفوكاتو يعركس ميتور ناجس ماعن طيبي

مدير الريجي مجعوز أل اربع ركيد درمل جيب هالسلاقي

لقد تابعت هذا المسلسل في محطة ابو ظبي ولم اكن افهم من كلامهم الا القليل ولكن حبي لباسم ياخور هو اللي خلاني اتابعه

خاصة انهم كلهم مكارين في المسلسل

هل صحيح أختي رانيا هاني في ناس بتحكي هاللهجة في سوريا

شكراً لدرس اللغة........... قصدي اللهجة

صباح الخير رنوش ...
بتعرفي انو بعدا 90% من هالمصطلحات تستخدم بشكل يومي ....
صدقي أنا بس روح عالضيعة بستخدم كتير منن ....
حلوين ما ....
يسعد صباحك ....
يهني اذا حكا الواح بيقولوا الواح كحا ... واذا الواح ما حكا بيقولوا ما حكا الواح ....

يسعدلي رنوش
يعني اذا الواح ما قلكن صباح الخير
تقولو الواح ابيفهم
و اذا الواح ما سلم عليكن بتقلو الواح ابيشوف
و الواح معكن احتار
رنوش يسعدلي صباحك و مساكي يا رايقه
و الله هنت احلا واح

راح الواح و اجا الواحد وشو بده يعمل ليعمل الواحد ايه خيي ابو حمد في عالم بتحكي هي اللهجة وحتى ضيعة ام الطناس كمان موجودة ومثل ما قال ابن الضيعة اكثر المصطلحات بتستخدم باكثر الاماكن بالضيع وعنا كذا كلمة مستخدمة بعدها لهلق
يسلمون رانيا حياتي اتي

المسلسلات السورية رائعة ولكن كان أروعها كان ضيعة ضايعة بشخصياته المميزة .. ولاذي استطاع أن يخرج ثقافة ولهجة موجودة فعلاً في مجتمعنا السوري ظلت لفترة طويلة مغبون حقها شكراً لك على الموضوع

موبس هيك يا حاتم
صاروا معظم الناس عم يحكوا متلن
والله حاسين حالنا عاطول بمسلسل واقعي

عمي ابن الضيعة ما في مو حلو ابدا مهما كان يعني انا هاللهجة تماما حبيتها مع انو اول المسلس كنت متل الاطرش بالزفة هههه .. اللهجات بحبها اجمالا الا الحلبية بالمررررررررررررررة ما بحبها ... ابو احمد خيي اي بيحكوا هاللهجة بس ما بعتقد بهالتقل هاد ... يسعد صباحكون و مساكون كتير عم استفقدلكون الصبح مع انو عم عوضها المسا بس .... هيي القصة بتبدا الصبح بس يالله كمان هيك ممنيييييييييح

صباحووووووووووو رنوشة ....... لعمى في عيون عيونك فرطتيني من الضحك و خاصة على فروج بروسلي ....هههههه أنا يا جماعة ما حضرت غير حلقتين من هل مسلسل بس رايدة أتابعه لما بيعطي بالفترة المسائية خبروني ......الفترة المسائية تعني بعد ال 6 .. ما تنسوا تخبروني .....شكرا رنوشة

رنووووووش تسلم دياتك يا بطه
و الله اشتقت اسمع ها للهجه ...آي يا بوي ..ما فاه منك اته ....ههههههههههههه
على فكره الكلمه اللي بتميز اهل اللادقيه هي كمله (عيّن ) ..لانه الواح ما بيسمعا الا هنيك Wink

» تعاريف لبعض المصطلحات
» لقطات من ضيعة ابن الضيعة ...
» بعض المصطلحات والألفاظ العُثمانيّة التي لا تزال مستخدمة في بعض الدول العربية