تراث شامي

موضوع: تراث شامي 02.06.09 18:12

أحببت ان أشارككم.... بعض من مصطلحات الشام القديمة.....

دشرو : يعني حل عنو، وحل عنو يعني اتركه بحاله

دغري: يعني إلى لقدام بشكل مستقيم

إحكي الدغري: يعني تكلم من غير لف و لا دوران

قوم دغري : يعني إنهض هللأ ( الآن )
ماني غضران : يعني لست بقادر وهي( بالميداني)...
يوه تشكل آسي : يوه مفرده يأتي شرحها لاحقاَ

تشكل آسي (بعيد الشر) تعبير يفيد شدة حب المتكلم للمتكلم عنه و بمعنى أدق أن تعقد أوراق الآس على قبري

والآس شجرة خضراء توضع غالبا على القبور عند الأعياد و زيارة القبور.

وهنا دلالة على أن قائل المقولة يحب محبوبه لدرجة الموت في سبيله و يحب أن يزوره محبوبه و يعقد الآس على قبره.

تقبر قلبي : مثل يلي قبلها.

يقبر عضامي: متل يلي قبلها و قبلها.

ريتو يطلع على قبري : متل يلي قبلها وقبلها و قبلها.

تكفنني : كذلك الأمر متل يلي سبقوها...حلكم تعرفوا المغزى

الشدة : و هي ورق اللعب المشهورة عالميا و مؤلفة من 52 ورقة و أربعة أصناف من الورق

الواه الواه : تعبير نسائي قح يفيد التمسخر على المخاطب

يوه الواه الواه : مثل اللي قبلها.... شبنا....
معبّا بـ بنطرون : يعني واحد أجدب وجاي يحكي

ولا : آداة تستخدم في النهر والشتم

وخنان عجمي : مسبة مانها ظريفة لكنها تستخدم للنهر عن الزعيق و الصياح...ربما المقصود بها الرسن الذي يوضع للدواب.

هش ...تع : تستخدم لنفس السبب السابق

أيدي بزنارك : تعبير يستخدم للتعبير عن الرجاء

دخيل الله : أيضاَ تعبير والمقصود به هو الاستغاثة بالله و تستخدم أيضا لشدة الفرح و الإعجاب

شعره متل الشوشة : أي أن شعره منفوش ومنكوش

شاشية : و هي الخرقة البيضاء تستخدم لعدة إستخدامات ( كصنع اللبنة)

نملية : و هي المخزن الذي توضع فيها المونة

الشوبك : و هي أداة تستخدم لترقيق العجين (سابقا حاليا سلاح نسائي محظور بالدول المتقدمه)

وضرّاب السخن : وهي مسبة. . وتعني ........ ما بعرف مسبة وبس

عكروت : يعني خبيث و ملعب

كَوكِش : يعني يفتش و يبحث

بَحبِش : بفتح الباء و تسكين الحاء أيضاً مفردة تعني البحث مع التمحيص

ينمحق : ويعني ينضرب على قامتو . . يسطفل

يسطفل : يعني زنبو على جنبو

يبعتلو حمى : أي تصيبه حمى ويمرض

يتحورق : متل يبعتلو حمى بس على أضرب ومعناها يحترق بالنار

يتقوص : بنفس المعنى و معنها المباشر يضرب بالرصاص

يتأمع : كمان هيك شي و معنها المباشر..يتم فصل رأسه عن جسده كما يتم تأميع البامية

أأعود يقعد رزك : يعني خيلتنا حاجة تحوص... و الحوص يعني تحرك جيئة و ذهابا في نفس المكان

والمعنى الأدق: يقعد رزك يعني تموت والناس ياكلو رز. .

لأنو من المعروف عندما يموت حدى بتصير عزيمة وبيطعمو الناس أوزي على روح الميت

والأوزي أكلة معروفة بالشام مألفة بشكل رئيسي من الرز

حاج أفلة: و تعني كفاك مزاح ثقيل.(أو سحب أفلام) و كانت في الماضي تعني شيء أثقل من هذا المعنى والله أعلم ما هو!!

يحرق حريشه: و هي مسبة مخففة عن مسبة أصلية..و حريشه..المقصود فيها حريمه

وين غاطط : وين مو مبين أو تعني فيما تفكر و أين وصلت في تفكيرك

والسبع تنعام : يعني إلنا الشرف

و النعم : مثل سابقتها

حيط بياخذو وحيط بيجيو : تقال للي بيسكر من كتر الترنح

مابيعرف الخمسة من الطمسه : عن الرجل يلي ماعندو ثقافة

سرّي مرّي : يلي بيخفق برات البيت وبخفق يعني يذهب و يعود جيئة و ذهاباو تعني أيضا رجع بخفي حنين

شندي بندي : للي بيحكي بلا طعمه شروي غروي

فايت بالحيط – طاقق الفيوز : للدلالة على انو ماعم يعرف يحكي مزبوط

مجنط : مفلس وما معه ولا قرش

مطقم : لابس بدلة

مأنتك : لابس على آخر طرز

كحته : إيدو ماسكه على المصاري . بخيل

شاطط ماطط : يعني مدلع زيادة

نعيان : يعني قلبو بارد

نايط = نعيان = بارد

شاضومه : بنت مجلوئة . . يعني كيف بدي إلكن . ... . قليلة أدب ومصبينه

شحاطة : مايلبسه المرء في قدمه عندما يكون في المنزل

بابوج: ما يلبس في القدم خارج المنزل

تعسيله : نومة بعض الظهر

مسرسبة : يعني بتحب النظافة كتير

أسسييع - أوعى الزيت : بمعنى وسع وفسح طريق

إغّيييييى : تعبير يسخدمه الأبضايات وبس

إتي بريتي : تستخدم كذلك للأبضايات ...وهي نوع من التخويف

العمى : تقال عند الدهشة

العفش : يقولها البعض كذلك عند الدهشة

جلالة : بتسكين الجيم يعني برداية و هي ما تغطي النوافذ

تجليلة : ماكانت تغطى بها المفروشات خارج مواسم الأعياد

تأكلو الدودة العميا : يعني الواحد يموت وياكله الدود (بعيدالشر ..)

هات لإللك: أي عطيني لورجيك كيف الشغل

يبعتلو أتلو شو سمج : كمان يعني يموت وسمج يعني غليظ

موسوس : مهووس بشي

عقلو جوزتين بخرج : يعني عقله صغير وقليل التدبير

متل الأطرش بالزفة : يعني ما فهمان ومالو علاقة بالموضوع

حاج تحوص وتلوص : يعني حاجة تفتل وتدور

شوية الرخار : بعد شوي (يعني بعد برهة من الزمن)

بنت عمي : يعني مرتو ...و العكس صحيح

موضوع: رد: تراث شامي 02.06.09 18:14

اقتباس :: إغّيييييى : تعبير يسخدمه الأبضايات وبس

هي اكثر وحدة ضحكتني... هههههههههههههههههه..

محبة....

موضوع: رد: تراث شامي 02.06.09 20:30

يا وليد اكثر الكلمات بعدها مستخدمة لهلق ونحن بالحياة اليومية مستخدمة وشكرا لك كمان ذكرتنا بكم كلمة كنت نسايها

موضوع: رد: تراث شامي 02.06.09 21:29

سماع هالكم كلمة تعلمتن من رفقاتي من السويدا
منصنف : زعلان
مستفتج : لامبالي
هرعو : للإشارة إلى الشيء القريب
هنوكهتي : لللإشارة للشيء البعيد
قرررررر ( بدون دال ) : للدهشة
بديش : أي لا أريد

وهي كم كلم تلمتن من دير الزور
هيجد : يعني لللإشارة إلى كمية معينة
هيجدان : كمان لللإشارة إلى كمية معينة
هسعتين : الوقت الحالي
خوش : يعني شغلة كبيرة .. مثال خوش زلمة
تع جاي : يعني تعال إلى هنا
انكلع : يعني حل عني
صكركة : مقلاية
جيدان : ابريق الشاي
تفاح الشوايا : فجل !!

لسا في كتييير
محبتي برسلها من هون لكل أصدقائي واحبابي بالسويدا ودير الزور

شكراً وليد

موضوع: رد: تراث شامي 03.06.09 7:20

صباح الخير وليد ....

أغيييييييييييييييييييييييييييييييي .... هههههههههههههههههههه

والله كتير حلوين هالتعابير .... بتعرف لازم نعمل أرشيف لهيك كلمات ... ونحفظا

رح اتذكر شوية كلمات من الضيعة .... بس مهلني شوي ... لانو بدا صفني

وليد ... وجدي ...مهند صباح الخير