تراب الأرض فيه عِزِّتنا000 بقلم: ابن الضيعة

يلاَّ يا أبني صاح الديك
هاتْ الصِّمِدْ ... والفِدَّان
تنروح نحرث أرض حقلتنا
لا تنسى السكة والنير والمسِبْلان
كل الناس ع الأرض سبقتنا
يا ابني بالحب ضم تراب ها لبستان
تا تكبر وتحلا عناقيد كرمتنا
الأرض يا ابني بتحب العطف كمان
حَدِّثْ حجارها ...... فيها روح
حجارتنا
جدَّك يا ابني بأيام شبابو كان
يضم الحجار ويغازل غصون شجرتنا
أرضك يا ابني صبية وجمالها فتَّان
وها لأرض بركة من جدودك تِرْكِتْنا
رغيف الخبز يا ابني مقدَّس ومنصان
كرمال .... من دهب هالأرض طحنتنا
و بها لأرض نحنا خلقنا ومن زمان
وبعدها من عطر ترابها .... ريحتنا
يا ابني لنبع المَيّْ بضل عطشان
وتغلا بْفَيّْ ها لشجرات أكلتنا
ولأختك نداه بعطف وحنان
الزوادة تصر وتْمَلّي قليلتنا
وللشفة تعبي ها لبِرشْ عيران
الشمس طلِّت وبنارها حرقتنا
وبطريقك يا ابني .....
كش ها لجيجات والصيصان
بحبشوا التراب ولمّوا حبوب قمحتنا
وصراخ صوت وقول لا ها لجيران
كرمالهن ها لواوي سكن جيرتنا
...............
يا ابني صون الأرض سيِّجها بريحان
حبات ترابها مجبولة بكرامتنا
وسماع مني ها لكلمتين وصية للزمان
تراب ها لأرض يا ابني فيه عِزِّتنا

طبعا هي من روح الضيعة وقررت اليوم انشرا على موقع سيريا نيوز
بس لازم تنزل بالمنتدى قبل .. وانا بعدني بالضيعة وحسبت حساب الشباب
بالزيتات طبعا التبولة عليكن
صباح الورد للجميع