ع حروف هالجرد قبل الصبح
بشوي ترغلوا الحجلات
ونغمة الراعي تصدح مواويل
وبَحَّة النايات
عند الصبح نسمة صَبَا
تولِّع صِبَا الماضي حكايات
ختيار ينده ..... صبية
بأيدها تروي الوردات
من خدودها الورد خطف
لون هالبتلات
ورحيق الزهر للعسل
من شفافها تجمع النحلات
وعصفور غرَّد ع كتافها
بريشة جناحو ع جفونها
وزَّع الكحلات
صبية متل الصبح باقة ندى
شعرها مطرَّز
من خيوط الشمس خصلات
وختيار ينده.....
آآآخ يا جدي ... قديش بين هالورد
لَسِتِّكْ غنيت أبو الزلف وهيهات
وعتابا ليطرب القمر
ويتمايلوا النجمات
آآآه يا جدي .... قديش طلّ الصبح
وسِتِّكْ فراشة ...... بين هالوردات
أمانة يا جدي ...... زرعي وردة
ع قبر سِتِّكْ ....
بلكي من عطر روحها
بتفوح هالنسمات
موضوع: ختيار ينده صبية 000000بقلم ابن الضيعة 
10.11.08 12:54
