* القِصْرين: هو عقد سوق سنابل القمح والتي لا فائدة منها
سوالف تمر هالأيام
ونحنا منلتهي بعدَّ ا
سالفة تلملم الأحلام
وسالفة نلتهي بسردا
***
والحلم نايم عمر
وبعدو الحلم صغير
***
يا عمر قديشك قصير
للشخص المقتدر
وقديش حملك صعب
ع العبد الفقير
يا عمر ربيعك طل .. وخلص
ريحانك بعمري دبل بكير
من أولك خريف وفقر
من أولك شقا وتعتير
يا عمر نصَّك ... هجر
ونصَّك التاني ... فقر
وليلك فراشو ... قهر
وأيامك نقطة ... بقعر هالبير
يا عمر أنت ظلمتني تخمين
شط أمانك ما بعرفو... وين
وصرت بسنينك عِدْ خمسين
لا تقول عني يا عمر مسكين
بعدو بالقلب في أمل ...
وعمر القلب بعدو... عشرين
رغم فقرك ... رغم قهرك
رغم بواب حظَّك علي ِّ مسكرين
من بيادرك رح أسرق أمل
ازرع جبينك ورد تشرين
من كفوفك لملم البسمات
لكانوا من عمري ضايعين
يا عمر فقرك بعمري دفا
قهرك لروحي شِفا
يا عمر أنا وهالقلب ...
ع بوابك ... بعدنا ناطرين
ومهما حصل ... لو بروضك
صار عمري قِصْرين *
رح ضل أسرح بكَرْمَك
قلبي رح يبقى بالعمر عشرين
ومن كرومك رح قطِّف ورد
وبورودك زيِّن خدود هالسنين
موضوع: صار العمر قِصْرين* ... بقلم : ابن الضيعة 
24.11.08 17:53
