يا شمس طلي أجا تموز ... بقلم : ابن الضيعة

يا شمس

طلّي ...

تعي ...

الأيام عم تمرق

من غير وعي

طلّي

ع بيادر ...

ع كروم ضيعتنا

حتى يستوي العنقود

وتنضج حبوب حقلتنا

ويسرح من الصبح ع الأرض

هالحاصود

وصبية تقطف عناقيد كرمتنا

وفلاح يفرح بثمر أرضو المعهود

وطاحونة ترقص ... لشوال قمحتنا

ورغيف الخبز سخن بتنورنا موجود

عجنتو أمي من خيرات طحنتنا

وسلال القصب

عناقيد تنملا ...

وتعود

مزينة

بثمرات تينتنا

يا شمس

طلّي ....

تعي ...

أجا تموز

خلّي المي من غير وعي

تغلي بجرتنا

وعند المسا ....

كل يوم

من هالحقل منعود

وتحلا مع النسمات سهرتنا