ناطرة القمر ... بقلم : ابن الضيعة

شفتا بها لصورة شاردة ومحتارة
والشعر سارح متل شلال
متل موّال عزفتو القيثارة
وقريت بعيونها شي ألف حكاية
والشغلة ما كتير بدها شطارة
ناطرة القمر تيطل من خلف تلة
يا بنت لأعراض العشق هي إشارة
لا تخافي للناس ما رح قول سرك
والحب يا صبية ... فخر وحضارة
والقمر لو طل وشاف خدك
دغري لبيِّك رح يعمل زيارة
ما بصدق قمر يعشق قمر
بس القمر فيكِ مش خسارة
وصلت الصورة وكنت ناطرا بلهفة
وشفت القمر...
ورفّ القمر بها لصورة رفِّه
وضاع القمر ...
وينو القمر مو باين عليِّ
في نور وخلف النور
وجه القمر مخفي
نور جبينها يمكن ...
وها لنور شموس الدني بيطفي
والخد متل الورد .. ويمكن جمر
يمكن نار
شعَّل نار ... بقلب كان مطفي
والرمش حد السيف ناطر هالمعركة ...
بلهفة ...
وعيون متل البحر صافية
متل السحر غافية
متل الشمس دافية
متل بلسم شافية
وبرمشة هدب بقلب الغدر
عيونها بتْدِبْ رجفة
يا قلب هَدّي مواجك شوي
سر السحر بعيونها مخفي
هيدي صبية... واسمها نغم ...
اسمها حلم ...
اسمها دوى من كل علة ... بيشفي
والكاس المتعود يحوي خمر
وآهات الندامى ... يخفي
طق الكاس ما تحمل صبر
عند ما لامس الكاس هالشِفة
في قلوب كتير عايشة بقهر
وناطرة من هالكاس ... شَفّة
وأنتِ يا قلب ...
يمكن إلكْ مَعَزّة بقلبها
يا قلب مَعَزّْتك بقلب هالصبية ...
بتكفي