دمعتك بعدا على خدي ... بقلم: ابن الضيعة

رفرفي وطيري
تعي ضلِّي بحدي
بلكي بحضنك برجع أغفى
وزندك يكون لراسي مخدّة
و هالقلب همومو بينسى
وبجنينة محبتك شْوَيّْ بيهدي
وسنين هالعمر حدك بتحلا
حاجي يا أمي سنين العمر مسودة
***
بعدني بذكر
طفل صغير
متل الحلم لما فيق بكير
ع صوتك يا أمي كنت طير
وغير رضاكِ ما بدي
***
بعدني بذكر خبزات هالتنور
وريحة الزعتر
والحوض مليان زهور
من طلتك بيسكر
وتضحكلك الوردة
وبعدني بذكر
الريحان والمنتور
متل عسكر
لخدودك التحية تأدي
يا ريت بعدني طفل صغير
لحضنك برجع
وغير حنانك ما بدي
***
بعدني بذكر بحالتِك شو صار
زغاليل نحنا والمرض غدار
ولصدرك تضمي
جمرات شاعلة نار
سلامتَك يا أمي تقولي
وتتلوعي
وتتنهدي
آآآآآآآآآآآآه ... يا أمي
دمعتك بعدا على خدي
***
بعدني بذكر
بأيدك تمسحي جبيني
وغناني تحرس الغفوة بعيني
بعدني بحس بكفك مندي
وأيدك على خدي
وغير دعواتك يا أمي ما بدي
***
لولا قلب الأم معبي الدني
قلوب البشر كان يمكن تصدي