الشوك ما بيثمر عنب ... بقلم : ابن الضيعة

الحب من قلوب الناس انشطب
ومن الجفا نبع الحب نَضَبْ
في قلوب مليانة ... عَتَبْ
وقلوب مليانة ... غضب
وقلوب من الحقد صارت حطب
وصدور مدججة بنيران
والنار ... ما بتشبع حطب
والعمر بسنينو سكب
هموم ... ما بتشبع تعب
والهَمّ من حقول الناس نَهَبْ
هالحب بليالي الغضب
دوحات ... يبست
صارت قش
صارت خشب
والقش ... ما بيقلب دهب
بإيدين عنوانا الفقر
والقهر ع جبينا اسم
بكفوفا ... لَقَبْ
الحب ما بينوجد
بقلوب مدفونة بلهب
الحب ما بينشرى
ما بينوهب
الحب نظرة أمل
مش قصيدة
ولا كلمات بتنكتب
الحب بسمة طفل
قلب أم معبّا دفا
بالحقد ما بينعطب
الحب لمسة شِفا
لقلوب كِلاّ نِدَبْ
الحب من قلوب الناس انشطب
والشوك ... ما بيثمر عنب
والميّْ ما بتنجمع بسلال القصب